Denne baksida kan skade omdømet til NHH

I samband med at NHH-student Lars Føleide har saksøkt ein medstudent for 36 millionar kroner, omtala studentavisa ved Norges Handelshøyskole (NHH) han i lite flatterande ordlag. Under overskrifta «JEG ER OFFERET» vert han i ei satirespalte blant anna skildra som sutrete, grisk, narsissistisk og røyndomsfjern.

– Eg synest det er viktig og riktig av K7 Bulletin å omtale saka. Når ein leverer eit søksmål må ein rekne med at ein vert eksponert i pressa med namn og bilete. Men eit personangrep som dette høyrer ikkje heime i norsk presse, seier Stein Jacob Frisch, dagleg leiar i kommunikasjonsbyrået Geelmuyden.Kiese.

PERSONANGREP

Frisch meiner at baksida kan skade omdømet til NHH.

– Baksida og søksmålet gir ei ripe i lakken for omdømet til NHH. Slik oppførsel gir eit useriøst inntrykk, og høyrer meir heime på ein ungdomsskule enn det som skulle vere ein utdanningsinstitusjon i verdsklasse.

Jan I. Haaland, rektor ved NHH, seier han har særs lite til overs for oppslag som kan verke sjikanerande og støtande. Baksida omtalar han som «uheldig».

– Eg håpar ikkje oppslaget skadar omdømet vårt. Alle som er knytt til NHH, både enkeltpersonar og organisasjonar, bør tenkje på at det dei seier og gjer kan påverke oppfatninga av skulen.

FORSVINNINGSNUMMER

Natt til tysdag forsvann 2 000 eksemplar av K7 Bulletin. Verken Kjernestyret eller ansvarleg redaktør, Andreas L. Farberg, veit meir om dette. Etter dette valte avisa å trykkje ei andre utgåve, som kom ut torsdag.

– Kvifor valde de å trykkje ei andre utgåve?

– Vi syntest det var veldig synd at avisa vart stelt, ettersom det låg mykje frivilleg arbeid bak avisa. Vi aksepterer ikkje at nokon prøver å sensurere oss ved å fjerne alle avisene, og difor trykte vi opp eit nytt opplag, seier Farberg.

FLEIRE AVISER ATT

Farberg erkjenner at baksida fekk meir merksemd i media enn venta. I Bergensavisen (BA) onsdag 25. februar, fortel han at baksida vart endra for å unngå at òg andre utgåve vart stelt.

I den andre utgåva er baksida med Føleide bytta ut med ein kvit bakgrunn og teksten: «Vi beklager til alle involverte. (men det var morsomt så lenge det varte.)». Stein Jacob Frisch i Geelmuyden.Kiese meiner endringa underbyggjer useriøsiteten som har funne stad.

– Den nye baksida gir inntrykk av at ein har vorte instruert om å be om orsak, men ikkje har noko eige ønskje om å gjere det. Anten får ein la vere, eller så får ein gjere det skikkeleg.

Debattregler

• Personhets har ingen plass i debattene våre. Ikke trolling eller injurier heller. Slike innlegg bidrar ikke til debatten og vil bli slettet.
• Innlegg som inneholder reklame, spam eller forsøk på verving vil bli slettet.
• Rasistiske ytringer er forbudt etter norsk lov og vil bli slettet.

Hvorfor sletter vi ikke alle dårlige innlegg?

Vi ønsker mest mulig åpne og inkluderende debatter med færrest mulig slettede innlegg. Vi sletter innlegg som bryter med loven eller våre etiske retningslinjer.

Gode kommentarer kan bli benyttet i papirutgaven.

MERK: Moderator og journalister skriver aldri innlegg i kommentarene, innlegg med avsender 'webmaster'/'web-ansvarlig' eller liknende er falske og vil bli slettet.