– Griegakademiet står for rundt 200 konsertar og andre opne arrangement i året, og er såleis ein viktig kulturaktør. Ved å samle alle miljøa vil vi tydeleggjere posisjonen vår, forklarar instituttleiar ved Griegakademiet, Frode Thorsen.
– Utgangspunktet er at vi ikkje berre driv med utdanning, men òg både er ein kulturinstitusjon og driv med forsking. Difor er «Musikkens hus» ei god sak, ikkje berre for Universitetet i Bergen (UiB), men og for Bergen kommune.
SAMLAR SKULEN
Tidlegare i år har Studvest sett fokus på situasjonen til studentane ved Griegakademiet som grunna plassmangel må nytte garderobar til øvingslokale. For å utvide kapasiteten, har skulen sidan 2005 freista å få kjøpe Nygård skole frå Bergen kommune.
– No har vi generelt dårlege lokale og to veldig dårleg utstyrte salar i Gunnar Sævigs sal og Prøvesalen. I salane manglar lysrigg, lyd og lysisolering, akustikkregulering, opptaksteknologi og lagerplass, forklarar Thorsen.
I dag held skulen til i tre lokale, blant anna halve Nygård skole. Får kjøpet for heile bygget gjennomslag, vil òg aktørar utanom studentmiljøet kunne samlast på skulen.
FORSKING OG MUSIKK
– Griegakademiet har allereie faste samarbeidspartnarar i til dømes Bergen Filharmoniske Orkester (BFO), Festspillene i Bergen, Borealis, Den Nye Opera, jazzmiljøet i byen og Bergen Kulturskole, forklarar Thorsen.
Tanken bak prosjektet er at skulen skal få større delar av aktivitetane knytt til desse samarbeidspartnarane inn på Nygård skole.
I prosjektskissen vert det òg nemnd at huset kan romme aktivitetar som utdanning, konsertar og seminar, innspelingar, musikkterapi-forskningssenter og klinikk, kurs, etter- og videreutdanning og forskningsformidling og tidsskriftsdrift.
EIT LITE «MEN»
Sjølv om det ifølgje Even Berge ved eigedomsavdelinga til Universitetet i Bergen (UiB) nærmar seg ein endeleg avtale med Bergen kommune, er det førebels ein vesentleg hindring på vegen til «Musikkens hus».
– Kommunen brukar no sin halvdel av Nygård skole til undervisning av framandspråklege elevar og må finne nye lokale til dette føremålet før dei kan flytte ut, forklarar Berge.
Siste ord i saka er at kommunen krev fem år leigetid, samt høve til å leige i fem ekstra år om dei treng dette for å finne nye lokale.
– FORTVILA SITUASJON
Dette tilseier at Griegakademiet i verste fall må vente heile ti år før innflytting.
– Vi er litt lei oss for er at kommunen slit med å finne andre lokale. I forhold til brukarane, studentane og dei tilsette ved Griegakademiet er det ein fortvila situasjon. Vi freister å få i stand ein avtale så tidleg som mogeleg, seier Berge.
Kommunen sjølv vil berre kommentere saka på generelt grunnlag.
– Vi har ein god dialog med Universitetet og tek sikte på å gjere ei overdraging så snart som mogleg, seier Merete Stangeland ved Bergen kommunale bygg.
LANG VENTETID
Studentane som i dag øvar i garderobar, må ifølgje Even Berge ved eigedomsavdelinga til Universitetet i Bergen (UiB) i verste fall vente inntil ti år.
I tillegg til ventetid, vil det òg gå med tid til omfattande oppussing av lokalet. Over ti år vil derimot ikkje instituttleiar Thorsen vente.
– Det er eit så langt tidsperspektiv at vi ikkje kan leve med det. Vi ber om at kommunen kjem seg ut av lokalene innan to år. Får vi ikkje ein avtale som gjer at vi kan flytte inn før om ti år, er ikkje Nygård skole ei løysing for oss, slår instituttleiaren fast.
Print;)
GA open dag