Helseskadelege lokale ved Griegakademiet

– Eg kan ikkje øve på bygget ettersom eg har astma. Å ligge på golvet, som songarar plar gjere, er heilt uaktuelt for meg grunna alt støvet som kjem i lungene.

Dette seier Hilde Hasselberg, student ved songlina på Griegakademiet (GA), ved Universitet i Bergen (UiB). Ho har fått merke konsekvensane av den dårlege luftkvaliteten ved Nygård skole, der GA held til.

– Derfor må eg gjere all øving heime.

Hasselberg fortel at ho har fått stadig verre helseplager etter at ho byrja ved Griegakademiet. Songstudenten held på med mastergraden sin, og hadde ikkje astma før ho starta å studere ved skulen.

– Om plagene kjem direkte på grunn av forholda ved Griegakademiet veit eg ikkje, men i løpet av tida her har dei berre blitt verre, fortel ho.

Ein rapport med ei eksternevaluering av forholda ved GA stadfestar at fleire studentar har fått auka plager og blitt sjuke av å opphalde seg i lokala på Nygård skole. Det er òg funnet spor av muggsopp.

Universitetsdirektøren ved UiB, Kari Tove Elvbakken, vil prinsipielt ikkje uttale seg om rapporten fordi universitetsleiinga avventar kommentarar frå Det humanistiske fakultet.

Høgt desibelnivå

Hasselberg er ikkje åleine om å vere kritisk til lokala. Også Studentutvalet ved GA er misnøgde med situasjonen.

– Det er ikkje haldbart at situasjonen er slik den er. Det skal ikkje vere slik at folk blir sjuke av å vere her, seier leiar for studentutvalet, Guro Strand, som også fortel om små øvingsrom med låg takhøgde.

– Trass lyddemparar er lyden likevel faretruande høg for dei som spelar lydsterke instrument, som messing og slagverk. Desibelnivået overskrider dei krava som er tillatt på ein arbeidsplass.

Ho omtaler det heile som ei hastesak, og får støtte av instituttleiar ved GA, Frode Thorsen.

– Det er fullstendig uhaldbart, og har vore det i mange år, meiner han.

– Jordal på alle fire

Hilde Sveen er lærar på GA. Ho fortel om vanskelege arbeidsforhold for dei tilsette ved Nygård skole.

– I førre veke kom det ein frå skadedyrkontrollen medan eg hadde undervisning, og sjekka om rommet hadde møll. Det har også vore eit tilfelle der møll spiste opp alle teppa i eit rom.

Ho meiner at fleire av romma er tidvis svært skitne.

– Helge Jordal låg til dømes på alle fire og vaska golvet i prøvesalen då han var her som gjesteforeleser, før studentane til slutt tok over vaskejobben, seier Sveen.

Presser på for renovering

Thorsen fortel at det mellom 2004 og 2010 var uavklart om UiB skulle kjøpe Nygård skole av Bergen kommune, og at verken kommunen eller universitetet på grunn av dette gjorde noko for å renovere bygget.

– Vi befant oss i ein problematisk skvis, seier instituttleiaren, og etterlyser ei snarleg løysing.

– Vi opplever situasjonen som på overtid og veldig alvorleg for både studentar og tilsette.

Thorsen fortel at instituttet pressa på for å kome i gang med renovering av lokalet.

– Vi forventar at universitetsleiinga tar tak i dette i løpet av kort tid, seier han, og understrekar samtidig at instituttet har hatt ein god dialog ved universitetsleiinga.

Det finst likevel studentar som føler seg gløymt av UiB.

– Eg trur ikkje Griegakademiet blir tatt på alvor av universitetet. Dei ser ikkje viktigheita av kultur, seier Henry Reitan, student på klassisklina.

Framleis for få øvingslokale

Studvest har tidlegare skrive om studentar som har teke i bruk garderobar som øvingslokale, noko som også blir poengtert av eksternrapporten. Plassmangel har vore eit tilbakevendande problem ved GA, og framleis er situasjonen med for få øvingslokale problematisk.

– Vi har altfor lite gruppe- og øvingsrom, derfor blir det stor slitasje på romma. Å dele 24 rom på 200 studenta gjer forholda vanskelege, seier studentutvalsleiar Guro Strand.

Instituttleiaren er einig i at det idag er altfor få rom til å huse dagens studentmasse.

– Vi kan ikkje halde fram i ein så dårleg bygning med så dårleg plass, seier Thorsen.

– Ingen konkret tidsplan

UiB eig idag heile Nygård skole, men måtte gå med på å leige ut halve bygget til kommunen då dei kjøpte dette frå dei i desember 2009, sidan kommunen bruker lokala til skuledrift. I verste fall kan det gå ni år før leigeavtalen er ferdig, ifølgje instituttleiar Thorsen.

Universitetsdirektør Kari Tove Elvbakken fortel at det føreligg konkrete planar om å rehabilitere Nygård skole, men at det ikkje er nokon konkret tidsplan.

– Vi er avhengig av at Bergen kommune finn nye lokale før vi kan gjere ei full rehabilitering. Vi har ein løpande kontakt med kommunen, seier ho, og fortel at Nygård skole til sommaren skal pussast opp utvendig.

– Kvifor tar rehabiliteringa så lang tid?

– Vi jobba lenge for å kjøpe skolen, og så sette vi i gang arbeidet med å pusse opp utvendig. Vi jobbar så raskt vi kan, seier ho.

Stort potensiale

På sikt er planen at GA skal nytte seg av heile Nygård skole. Instituttleiar Frode Thorsen meiner bygget har eit stort potensiale.

– Lokaliseringa, rett ved Grieghallen, er ideell for oss. Det er ikkje berre ein studiestad, men òg ein kulturinstitusjon, seier Thorsen, og fortel at også fleire av lærarane arbeider i Bergen Filharmoniske Orkester, i tillegg til GA.

Instituttleiaren har ei klar oppfordring til Bergen kommune.

– Vi håpar også at Bergen kommune snart innser verdien i at Griegakademiet får utvikle seg i Nygård skole. Då må kommunen finne andre lokale til den verksemda dei har der no. Visjonen vår er å utvikle «Musikkens hus» – eit konsept som er forankra i samarbeidsavtalane våre med kultur- og forskingsmiljø i Bergen og i «Handlingsplan for UiBs forhold til omverdenen».

Også studentar og lærarar håper å kunne nytte seg av heile bygget.

– Det hadde vore unikt å ha alt på ein stad, seier leiar i studentutvalet, Guro Strand, og får støtte av lærar Hilde Sveen.

– Eg håpar eg kan få oppleve at heile bygninga tilhøyrer Griegakademiet før eg pensjonerer meg, seier ho.