Alt under kontroll

«Er du redd for at partnaren din er utru? Har ektefellen din plutseleg behov for privatliv? Er han eller ho løyndomsfull i telefonen? Mobiltelefonen speler ein rolle i nesten alle affærar. Du har rett til å få vite sanninga.»

Slik markedsfører den amerikanske teknologinettstaden hothardware.com den nye applikasjonen Phone Tracker for smarttelefonar. For å spionere, må ein fysisk installere software på den aktuelle telefonen. Det tar eit minutt eller to. Så er det tut og køyr. Med Phone Tracker får overvakaren tilgang til alle tekstmeldingar, alle inngåande og utgåande telefonnummer, kor lenge samtalane varte, alle kontaktar, GPS-plassering, alle nettsider som er besøkte, og alle e-postar som er mottatt og sendt. Ein kan til og med aktivere mikrofonen og gjere skjulte opptak av samtalar. Alt dette utan å etterlate seg spor på mistenkte sin telefon.

Applikasjonen kan med dette avdekkje barneporno. Ein kan oppdage lyssky forretningsverksemder. Kanskje førebyggje utruskap - eller ein avslørande tekstmelding på partnaren sin telefon kan bli det som skal til for å bryte ut av eit destruktivt forhold. Men prisen å betale er høg. For høg.

Tidlegare har overvakinga begrensa seg til den offentlege sfæren. Overvakingskamera og datalagringsdirektiv skal kunne avdekkje kriminalitet og hjelpe til å ta dei skuldige. Med smarttelefonane si nye programvare kan vi sjølv vere politi overfor våre næraste. Dei blir kriminelle inntil det motsette er bevist. Vi behandlar dei vi er mest glade i på lik line med menneske som trugar tryggleiken til landet vårt.

Med dette som utgangspunkt omfamnar vi paranoiaen, det forårsaker mistenkjeleggjering av dei det kanskje er viktigast å ha tillit til. Vi blir på vakt, ikkje bare overfor partnaren vår, men òg overfor dei vi har kontakt med på telefon og e-post. Ein må forsikre seg om at ikkje noko kan bli misforstått i tilfelle nokon skulle spionere.

Nei, eg er ikkje redd for at han skal vere utru, men han har behov for privatliv, og ja – han går ut på gangen og snakkar i telefonen. Vi er mange som kan seie oss einige i spørsmåla frå hothardware.com. Likevel blir ein like lite utru av å ha eit privatliv som ein blir Petter Northug av kjøpe seg langrennski.

Phone Tracker aleine utgjer ikkje eit stort samfunnsproblem, men det er eit symptom på haldningane våre. Menneske som lever i eit samfunn der overvaking og kontroll blir ein føresetnad for tryggleik, blir grunnleggjande utrygge.