Etterlyser meir ressursar

Nasjonalt organ for kvalitet i utdanningen (NOKUT) presenterte nyleg ein rapport over kvaliteten på førskulelærarutdanningane i landet. Høgskolen i Bergen held forholdsvis høg kvalitet på utdanninga, men det fins problemområde.

– Rapporten syner at førskulelærarutdanninga har ein tendens til å bli nedprioritert i forhold til utdanning retta mot skule, og dette gjeld nok også her i Bergen, seier Dag Orseth.

Hilde Rise, førskulelærarstudent på andre året, er einig med rapporten i at utdanninga held høg kvalitet, men ser også moglegheiter for betring.

– Nokre fag har eit større potensiale enn det vi opplever i dag, og studentane hadde tålt at det blei stilt litt høgare krav til dei innimellom, seier Rise.

Problematisk vikarbruk

Nedprioriteringa av førskulelærarutdanninga gjer at bruken av vikarar aukar. Dei fast tilsette jobbar heller med lærarutdanninga. Orseth tykkjer dette er uheldig.

– Her ved høgskulen er bruken av vikarar ganske utbredt, og det er klart dette kan vere problematisk, seier han.

Rise er einig i dette.

– Eg opplever at problemet ikkje er kompetansen til vikarane, men at det blir for stor variasjon i undervisningsmetodar.

Ho ser problemet med at eit fåtal lærarar følgjer studentane gjennom all undervisninga, men ønskjer ein middelveg.

Behov for oppdatering

NOKUT-rapporten viser også til mangel på oppdatering av undervisninga i forhold til at det i dag er mange små barn og fleirkulturelle barnehagar.

– Dette har vi påpeikt sjølv, og vi satsar i år ekstra på å utvikle kompetanse i forhold til små barn. Neste år vil dette gjelde fleirkulturelle problemstillingar, fortel Orseth.

Rise er nøgd med oppdateringa av undervisninga.

– Vi har mange kompetente lærarar som generelt sett er flinke til å trekke inn faktiske forhold i barnehagar inn i det faglege, seier ho.

Ressursmangel

Mangelen på rettleiingskompetanse blant øvingslærarane i praksisperiodane er også framheva som eit problem.

– Øvingslæraren sin kompetanse kjem an på personen, men studenten sitt utbytte kan vere prega av om øvingslærar har teke rettleiingskurs eller ikkje, seier Hilde Rise.

Høgskulen tilbyr rettleiiingskurs til alle som skal vere øvingslærarar.

– Vi vil gjerne tilby endå fleire kurs, men dette krev ressursar som vi ikkje har, seier Dag Orseth.

Han etterlyser meir midlar frå departementet.

– Eg forventar at institusjonane no tek tak i utfordringane, men det er tydelege behov for ein nasjonal innsats også, seier forskings- og høgare utdanningsminister Tora Aasland i ei pressemelding.