Mest aktive brukere »

Nyhet.

Rekordval på HiB – igjen

INNVALD. Anders Veggeland er nyvald representant i studentparlamentet til Hib, og trur nok mange stemmer på folk dei kjenner. – Eg trur dei som kjenner oss veit meir om kva me står for enn andre, seier han. Foto: EMIL WEATHERHEAD BREISTEIN

Valoppslutnaden ved HiB steig frå 25 til 29 prosent i år. – Intime miljø og personval er suksessoppskrifta, trur Frank Aarebrot.

Tekst: GERD MARGRETE TJELDFLÅT
Sist oppdatert: 23.11.10 kl. 22.15

– Det har gått veldig bra, seier ein nøgd Sindre Dueland, nestleiar i Studentparlamentet (SP) ved Høgskolen i Bergen (HiB).

Han fortel at det ligg mykje arbeid bak den gode valoppslutnaden.

– Me har arbeidd godt med å profilera oss overfor studentråda, og der er det representantar valt direkte frå klassar. Studentråda har difor god kontakt med klassane, forklarar han.

I tillegg har politikarane vore synlege både på stand og på Internett i form av It's Learning og Facebook.

– Godt arbeid

Nyvald representant i SP, Anders Veggeland, trur arbeidet har bidrege til å få valdeltakinga opp.

– Folk frå SP har vore flinke til å informera. Men generelt har det vore godt engasjement til alle aktivitetar ved HiB i haust, meiner han.

Rektor ved HiB Eli Bergsvik er svært nøgd med den gode valoppslutnaden.

– Eg har snakka med studentparlamentsleiaren i dag og rost dei for arbeidet dei har gjort. Dei har verkeleg jobba for auka deltaking, seier ho.

– Dette viser at me har eit aktivt og godt SP som har klart å mobilisera mange studentar.

Stemmer på kjende

Men det gode resultatet kan også ha andre årsaker enn god informasjon og marknadsføring.

– HiB har framleis ganske ulike og spreidde miljø, slik at det blir ganske intime høve. Det er kanskje lettare å få opp valoppslutnaden når ein kjenner kandidatane, meinar valforskar Frank Aarebrot.

Aarebrot trur difor også det hjelper på oppslutnaden å ha personval.

– Politikken vert då mindre viktig enn personen, forklarar han.

Dueland har observert tendensar som støttar opp om dette.

– Det me kan sjå av stemmegjevinga er at dei fleste ikkje stemmer på så mange dei faktisk har høve til å stemma på. Dei stemmer gjerne berre på folk dei veit kven er, trur han.

Veggeland er også einig. Men han trur bekjente også har betre grunnlag å stemma på.

– Eg veit ikkje kor mykje studentane set seg inn i kva me står for. Men dei som kjenner oss set seg kanskje betre inn i det, hevdar han.

STUDENTPARLAMENTSVAL VED HIB
  • 30 kandidatar stilte til val.
  • Av desse vart 17 representantar valt inn i Studentparlamentet.
  • Avdeling for lærarutdanning, helse- og sosialfag og ingeniørutdanning utgjer kvar sin valkrins.

VALOPPSLUTNAD VED HIB

  • 2006: 17,5 prosent
  • 2007: 7,2 prosent
  • 2008: 17,49 prosent
  • 2009: 25,05 prosent
  • 2010: 29 prosent

Debattregler

  • Personhets har ingen plass i debattene våre. Ikke trolling eller injurier heller. Slike innlegg bidrar ikke til debatten og vil bli slettet.
    Innlegg som inneholder reklame, spam eller forsøk på verving vil bli slettet.
  • Rasistiske ytringer er forbudt etter norsk lov og vil bli slettet.
    Hvorfor sletter vi ikke alle dårlige innlegg?
  • Vi ønsker mest mulig åpne og inkluderende debatter med færrest mulig slettede innlegg. Vi sletter innlegg som bryter med loven eller våre etiske retningslinjer.

Gode kommentarer kan bli benyttet i papirutgaven.