Vedtok omdiskutert arbeidsprogram

Tysdag vedtok Studentparlamentet ved UiB (SP-UiB) sitt nye arbeidsprogram. Sosialdemokratane og Raud liste meiner programmet er prega av vage prinsipp framfor konkrete tiltak.

— Arbeidsprogrammet fungerer ikkje som eit styringsdokument, slik det skal gjere. Det har for mange saker, og manglar enkeltsaker som vil synleggjere studentpolitikken på universitetet, seier Peter Hatlebakk, leiar for Sosialdemokratane.

– Lite tilgjengeleg

Årets arbeidsprogram er i tillegg også eit politisk prinsipp-program. Dette meiner opposisjonen er lite heldig.

– Eit arbeidsprogram skal vere målrett, fokusert og konkret for å kunne kommunisere med veljarane. Viss ikkje blir det lite tilgjengeleg, sa Hatlebakk under møtet.

Han la òg vekt på at programmet kan bli for omfattande, då Arbeidsutvalet (AU) berre skal sitte eit halvt år denne gongen.

Leiaren for SP-UiB, Tine Blomfeldt, ser ikkje at det er eit problem å legge politiske prinsipp inn i arbeidsprogrammet.

– Grunnen til at vi har eit prinsipp-program er at vi må gi studentpolitikken ein kontinuitet ved at enkelte saker blir vidareførte. Vi hadde også problem med å sette saman to komitéar, og tenkte at det er betre med eitt godt program enn to halvgode, seier ho.

Vil ha konkrete tiltak

Martin Årseth, leiar for Raud liste, stiller seg bak kritikken til Sosialdemokratane. Han meiner det kan bli for lett for AU å la vere å gjennomføre det dei set seg føre.

– Det er vanskeleg å måle kva som faktisk har blitt gjort utan konkrete tiltak som det kan visast til at ein har kome i mål med, seier han.

Blomfeldt meiner det ikkje nødvendigvis er bra om programmet blir for konkret.

— Problemet med konkrete tiltak er at ein då låser seg til saker som seinare gjerne fell vekk. Men det er klart at det må kunne bli målt kva vi har klart å gjennomføre etter ein periode, seier ho.

Kommunikasjonsproblem

Hatlebakk meiner at det vage arbeidsprogrammet vil gjere at studentane ikkje ser kva moglegheiter som ligg i studentpolitikken.

– Studentpolitikken klarer ikkje å kommunisere til studentane at vi faktisk har makt til å påverke kvardagen deira på mange måtar, seier han.

Blomfeldt meiner det viktigaste for Studentparlamentet er å ha kontakt med studentutvala.

– Det er ikkje mogleg for oss å ha kontakt med alle studentane på universitetet. Vi må derfor fokusere på å jobbe godt saman med studentutvala, som igjen har kontakt med studentane, seier ho.