Etterlyst: Folkekyrkja

I september presenterte Aftenposten tal frå European Social Survey (ESS), der det kjem fram at nordmenn er blant dei minst religiøse i Europa og at berre to prosent av alle nordmenn går jamleg i gudsteneste. Med ein slik statistikk, samt ei låg oppslutning om kyrkjevalet i år i bakhovudet, tek blant anna Dagbladet-kommentator John Olav Egeland bladet frå munnen: Vi har ikkje noko folkekyrkje. Vi har ei kyrkje utan folk. Berre store hendingar som dåp, bryllaup, konfirmasjon og gravferd trekkjer dei store folkemengdene. På dei vanlege gudstenestene vert ikkje dørstokken rent ned av massene, men traska forsiktig over av eit knippe pensjonistar.

Dei fleste kyrkjene i landet ser ut til å leve i ei eiga boble dei håpar samfunnet vil ta del i, i staden for å stikke hol på eiga boble og verte ein del av samfunnet sjølv. Søndag kunne ein på fjernsynet og på fleire nettaviser derimot sjå og lese om eit forfriskande innslag i kyrkja. Ris kirke i Oslo hadde nemleg i ei vanleg gudsteneste valt å bruke songar av det irske rockebandet U2 framfor dei tradisjonelle salmane. Grunngjevinga frå prest Ole Jakob Løland til TV2: «Vi gjer det fordi U2 er blant dei moderne artistane som har skrive nokre av dei viktigaste salmane i vår tid. Det er salmar i den forstand at det er musikk som kommuniserer det kristne bodskapet.»

Ein som har arbeidd med tanken om ei folkekyrkje er Paul Skuland, tidlegare sokneprest i Nord-Hålogaland bispedømme. Under studiepermisjonen hans i 2005-2006 skreiv han oppgåve med følgjande konklusjon: «Vi har i dag ei folkekyrkje som ikkje fungerer som ei kyrkje for folket» og «Vi treng ein offensiv folkekyrkjeleg visjon om at (.....) Gud vert lovprisa òg utanfor kyrkjehusa. Friluftsgudstenester og gudstenester i andre lokale. Det vert ope for folk si allminnelege tru i kyrkja».

Om kyrkja ikkje i større grad vert ein del av kvardagen til medlemmene av statskyrkja – vert det etter kvart heller ikkje naturleg å gå opp kyrkjetrappene ved dei store milepælane i livet. Kyrkja har nemleg ikkje klart å femne om desse når det har kome så langt. Det er ikkje snakk om at kyrkja skal kikke på dette-er-heitt-i-år-lister, men at ho på nokre punkt fornyar formidlinga av den kristne bodskapen. Til dømes med litt meir Bono inn blant kyrkjeveggane, å endre tidspunktet for gudstenester og, innimellom, ha alternativ opplegg til den vanlege gudstenester ein gong i månaden.

Ei av styrkjene til den posisjonen kyrkja har er nettopp i det stabile og tradisjonane. Men så lenge statskyrkja er kyrkja for heile folket, må ho vere ein stad for alle medlem. Både dei som syng bordbøn, og dei som er støttemedlem. Gudstenesta, med røter 2000 år tilbake i tid, er ikkje nødvendigvis den beste løysinga for kyrkjefolket anno 2009. Vonleg tek andre kyrkjer til seg litt av nytenkinga til Ris kirke som har inkludert U2 i gudstenesta. Fleire religiøse leiarar bør i alle fall tilpasse seg potensielle kyrkjegjengarar meir enn eit av tiltaka i kyrkja mi heime: Overføring av lyd frå gudstenesta til gamleheimen. Slikt vert det ikkje nye kyrkjegjengarar av.

Debattregler

• Personhets har ingen plass i debattene våre. Ikke trolling eller injurier heller. Slike innlegg bidrar ikke til debatten og vil bli slettet.
• Innlegg som inneholder reklame, spam eller forsøk på verving vil bli slettet.
• Rasistiske ytringer er forbudt etter norsk lov og vil bli slettet.

Hvorfor sletter vi ikke alle dårlige innlegg?

Vi ønsker mest mulig åpne og inkluderende debatter med færrest mulig slettede innlegg. Vi sletter innlegg som bryter med loven eller våre etiske retningslinjer.

Gode kommentarer kan bli benyttet i papirutgaven.

MERK: Moderator og journalister skriver aldri innlegg i kommentarene, innlegg med avsender 'webmaster'/'web-ansvarlig' eller liknende er falske og vil bli slettet.