Lokalaviser over heile landet har eit evig dilemma. Dei jobbar på ein liten stad. Alle kjenner alle. Og set dei fingeren på kritikkverdige forhold, kan dei rekne med at orda deira påverkar bestemora, nevøen, eller kompisen til nokon i redaksjonen. Eller viktige kjelder. Vurderinga må dei heile tida ta: Skal vi tenkje best-mogleg-sak, eller å halde på den gode tonen?
Same dilemmaet har òg K7 Bulletin (Bulle), studentavisa for Norges Handelshøyskole (NHH). Etter at skjenkekontrollen i mars sette fingeren på det ulovlege bongsystemet til Kjelleren, valgte Bulle å vie spalteplass til bruduljane. Og murringa kom. På Foreningsmøtet som studentforeninga (NHHS) kalla inn til 1. oktober, kom det fram at fleire ikkje sette pris på sakene. Rolla som vaktbikkje set dei pris på - berre dei ikkje omtalar interne forhold. Ekstra vanskeleg vert det då når redaktørane i avisa sjølve er tillitsvalde i NHHS, men skal vere uavhengige.
Her kjenner Studvest seg att. Velferdstinget, som er pengeutdelar og kjelde for kritiske nyhendesaker, utgjer eit etisk dilemma for pressefridomen til Studvest. Ikkje fordi vi då unngår å skrive om dei - det er ein del av arbeidsoppgåva vår. Men kan ein alltid rekne med at pengesekken klarar å skilje kritikar og pengemottakar? Historia har inkludert døme på båe delar. Både Trondheim og Bergen har døme på at politikarar raslar med sabelen når studentpressa tek opp upopulære sakar.
Fakta er at Bulle ikkje gravde fram saka sjølv, men rapporterte om eit velkjend problem fordi skjenkjekontrollen hadde banka på døra. Det var kontrollørane, og ikkje vaktbikkja, som førte til at skjenkerutinene vart lovlege. Når delar av tilbakemeldingane på møtet går ut på at «vi vil ha dykk som vaktbikkje - berre ikkje de skriv om oss», har kritikarane misforstått kva pressefridom handlar om.
Det kritikkverdige er ikkje at Bulle har skrive noko NHHS ikkje likar. Det kritikkverdige er at dei tidlegare Bulle-redaktørar faktisk ikkje har skrive om eit ulovleg system som det verkar som om heile skulen har vore vel vitande om. Studvest gir si fulle støtte til at Bulle skriv dei upopulære sakene, og håpar på vegne av NHH-studentane at dei får nye redaktørar som vågar å gjere jobben sin. Og det sjølv om det kan føre til dårleg stemning i målgruppa.
Stem for demokratiet
Når Frank Aarebrot i denne utgåva av Studvest poengterte at studentparlamentet på Universitetet i Bergen strengt tatt ikkje er demokratisk valgt med 50 prosent oppmøte, er det med ein resignert aksept over at vi nok ikkje vil oppnå det talet i dei næraste åra. Like fullt: Studentparlamentet har direkte innverknad på studiekvardagen din og kan få utretta konkrete ting. Spring og stem.
Og for å ta ei litt gamal regle for universitetet: Sjå til NHH. Som så mange andre ting får dei til dette med val, og det å møte opp til valgurnene. Det er fleire universitatsstudentar enn NHH-studentar, men prosentandelen som stemmer på Høyden er framleis latterleg låg. Og urnene er berre eit tastetrykk unna. Såpass kan ein ofre for å gjere studentdemokratiet litt meir demokratisk.
Print